काठमाडौँ – नेपाल प्रिमियर लिग (एनपिएल) अन्तर्गत आफ्नो दोस्रो खेलमा सुदूरपश्चिम रोयल्सले काठमान्डु गुर्खाजलाई ७३ रनले पराजित गरेको छ। टियू मैदान कीर्तिपुरमा सुदूरपश्चिमले दिएको १ सय ६८ रनको लक्ष्य पछ्याएको काठमान्डु १५.५ ओभरमा ९४ रनमै अलआउट हुन पुग्दा सुदूरपश्चिमले अर्को फराकिलो जित हासिल गरेको हो।
काठमान्डुलाई सस्तैमा समेट्ने क्रममा नरेन साउदले ३.५ ओभर बलिङ गर्दै १९ रन खर्चिएर पाँच विकेट लिए। त्यस्तै, अभिनाश बोहराले २ विकेट लिँदा ब्रान्डन म्याकमुलन र साइफ अली जइबले समान १–१ विकेट लिए।
काठमान्डुका लागि स्टेफन एस्कान्जीले ३७ रन बनाउनु सर्वाधिक रह्यो। उनीबाहेक सुमित मर्हजनले १४ रन बनाउँदा भिम सार्की र गेर्हार्ड एरासमसले समान १०–१० रन बनाए।
त्यसअघि टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १ सय ६७ रन बनाएको थियो। १७ रनमा पहिलो विकेट गुमाएको सुदूरपश्चिमका लागि ब्रान्डन म्याकमुलम र विनोद भण्डारीले दोस्रो विकेटका लागि ८६ रनको साझेदारी गरेपछि सुदूरपश्चिमले प्रतिस्पर्धात्मक स्कोर बनाउन सक्यो।
म्याकमुलमले ३६ बलमा ५३ रनको अर्धशतकीय इनिङ्स खेले। उनले आफ्नो इनिङ्समा ३ चौका र ४ छक्का प्रहार गरेर आउट भए। त्यस्तै, ओपनर विनोद भण्डारी पनि ३५ रनमा आउट भए। भण्डारीले २८ बल खेल्दै २ चौका र २ छक्का प्रहार गरेका थिए।
त्यस्तै, कप्तान दिपेन्द्र सिंह ऐरी २५ बलमा ३ चौका र २ छक्काको सहयोगमा ४३ रनको विष्फोटक इनिङ खेलेर आउट भए। त्यसअघि ओपनर साइफ जाइबले ११ रन बनाएका थिए।
काठमान्डुका लागि रसिद खानले २ विकेट लिँदा साहव अलाम र गेर्हारड एरासमसले समान १–१ विकेट लिए।
