ज्ञानेन्द्र थापा बेलौरी : कञ्चनपुरको बेलौरी नगरपालिका वडा नम्बर ३ का वडाध्यक्ष सिताराम रिजालको निधन भएको छ । केही महिनायता फोक्सोसम्बन्धी समस्याबाट ग्रसित वडाध्यक्ष रिजालको गएराति १२:३० बजे आफ्नै निवासमा निधन भएको परिवारजनले जनाएका छन् ।
उहाँ प्रति श्रद्धाञ्जलीका लागि आज बिहान १०:०० देखि ११:०० बजेसम्म पार्थिव शरीर वडा कार्यालयमा राखिने र त्यसपछि आजै दिउँसो बेलौरी स्थित भकुण्डा आर्यघाटमा अन्तिम संस्कार गरिने बताइएको छ ।
२०७४ सालको स्थानीय तह सदस्य निर्वाचनमा उहाँले नेकपा (एमाले) बाट वडाध्यक्ष पदमा उम्मेदवारी दिनु भएको थियो । तर झिनो मतान्तरले पराजित हुनुभयो । त्यसपछि २०७९ सालको स्थानीय तह सदस्य निर्वाचनमा उहाँ वडाध्यक्ष पदमा निर्वाचित हुनु भयो ।
उहाँकी श्रीमती डिल कुमारी रिजालको २०७९ सालको स्थानीय तह निर्वाचनकै समयमा निधन भएको थियो । उहाँका छोराहरू हरिप्रसाद रिजाल, स्व. अर्जुन प्रसाद रिजाल, बाबुराम रिजाल, ठाकुर प्रसाद रिजाल र छोरी गीता रिजाल हुन् ।
वडाध्यक्ष रिजालको असामयिक निधनले बेलौरी क्षेत्रमा शोकको वातावरण बनेको छ । स्थानीयवासी र शुभचिन्तकहरू समाज र राजनीतिमा उहाँले पुर्याएको योगदानको स्मरण गरिरहेका छन् ।
