कृष्ण बहादुर देउबा बेलडाँडी : बेलडाँडी गाउँपालिका प्रमुख हरिशचन्द्र रानाले गाउँपालिकाको केन्द्र चवन्नी बजारलाई व्यवस्थित बनाउन व्यापक पहल गरिरहेका छन् । तर, यो सुधार प्रयासलाई केही जनप्रतिनिधि, ठूला व्यापारी, तथा प्रतिपक्षीले गलत प्रचार गरेर प्रभावित पार्ने प्रयास गरिरहेका छन् । उनीहरूले “पुरै बजार उठाइन्छ, सबैका संरचना भत्काइन्छ, २८, ३० मिटर बाटो लग्दै छ, गरिबको उठिबास लगाइँदैछ” भन्ने झुटो अफवाह यहाँ मात्र होइन संघिय सदनमा समेत फैलाएका छन् ।

प्रमुख रानाले बजार व्यवस्थापनका लागि नक्सामा रहेका सडकहरू खुला गर्न खोजेका हुन्, जसले बजारलाई थप सुन्दर र व्यवस्थित बनाउनेछ । यस योजनालेः सडक फराकिलो हुने, दुर्घटना न्यूनीकरण हुने, व्यापार गर्न सजिलो हुने, ग्राहक र पैदलयात्रुहरूलाई सुविधा पुग्ने, साथै, यो सडक बेलडाँडीको प्रमुख पर्यटकीय गन्तव्य कालिकीच जोड्ने भएकाले पर्यटकहरूलाई स्थानीय बजारसम्म ल्याउने वातावरण बनाउनेछ ।

पालिकाले फुटपाथ निर्माण, सडक बीचमा हरियाली वृक्षारोपण, बजारको पहिचान झल्किने त्रिशुलको मूर्ति निर्माण,खाने पानी , सार्वजनिक सौचालय ,cctv, प्रहरी बिट, आधुनिक लाइट जडान गर्ने जस्ता योजनाहरू अघि बढाएको छ । जसले समग्र बजारको सुन्दरता बढाउनेछ ।

यो व्यवस्थापन योजनाका कारण बजारमा सडकको नक्साभित्र पर्ने केही व्यापारीहरू प्रभावित हुनेछन् । तर, अन्त कतै जमिन नभएकाहरुको स्थानीय सरकारले व्यवस्थापन गर्ने जिम्मेवारी लिइसकेको छ । विकासका नाममा विगतदेखि चलेको अन्यायपूर्ण व्यवस्थालाई अन्त्य गर्न यो महत्वपूर्ण कदम हो । तर, केही पक्षले आफ्नो स्वार्थका लागि झूटो प्रचार गर्दै व्यवस्थित बजार निर्माणको बाधक बन्न खोजेका छन् ।

नेपालमा प्रायः विकास नहुनुमा गुनासो गरिन्छ, नेताहरुलाई गाली गरिन्छ, तर जब कुनै सकारात्मक प्रयास सुरु हुन्छ, त्यसलाई अवरोध पु¥याउने प्रवृत्ति हावी हुन्छ । सडकको नक्साभित्र ठूला संरचना बनाउने, सानालाई विस्थापित गर्ने, तर ठूला व्यापारीहरूलाई संरक्षण दिने पुरानो परिपाटी अब अन्त्य हुनुपर्छ ।

बेलडाँडीको भविष्य उज्ज्वल बनाउन सबैले समन्वय र सहयोग गर्नुपर्छ । “मेरो मात्रै फाइदा होस्, अरू जेसुकै भए पनि फरक पर्दैन” भन्ने मानसिकता त्यागौं र समृद्ध बेलडाँडी निर्माणमा योगदान दिऔं ।

बजार व्यवस्थित हुँदा स्थानीय व्यवसायीलाई पनि दीर्घकालीन फाइदा पुग्छ । खुला सडक, राम्रो यातायात व्यवस्थापन, सफा वातावरण, र आधुनिक पूर्वाधारहरूले ग्राहक आकर्षित गर्छन् । यसबाट स्थानीय उत्पादन र व्यवसायलाई प्रवद्र्धन गर्न मद्दत पुग्ने छ ।