काठमाडौं । गायक सुशान्त केसी आगामी शनिबार भक्तपुरको सल्लाघारीमा गुञ्जिने तयारीमा छन् । ‘सुशान्त केसी लाइभ इन नेपाल’ नाम राखिएको यो कन्सर्ट साढे २ वर्षपछि केसीको पहिलो उपत्यका कार्यक्रम हुनेछ ।
विज्ञापन
यो प्रतीक्षित कन्सर्टको लागि सुशान्त यतिबेला तयारीमा जुटेका छन् । १५ हजारभन्दा धेरै दर्शक सहभागि हुने बताइएको यो कन्सर्टमा अन्य चर्चित व्यक्तिहरूलाई पनि उपस्थित गराउने कसरत केसीले गरिरहेका छन् ।
यस्तोमा, काठमाडौं महानगरका मेयर समेत रहेका गायक बालेनलाई पनि उनले सोमबार कन्सर्टमा उपस्थित हुन निम्तो दिए । आफूले बालेनलाई निम्तो दिएको र उनी कन्सर्टमा सहभागि हुने आशा आफूले राखेको सुशान्तले जनाएका छन् ।
उनले बालेनसँगको भेटबारे सामाजिक संजालबाट जानकारी दिएका छन् । उनी लेख्छन्, ‘मेयर बालेन शाहसँग राम्रो कुराकानी । र्यापदेखि जिम्मेवारीसम्म । वास्तवमै लिजेन्ड । काठमाडौं कसरी अझ जीवन्त र सुन्दर शहरमा विकसित हुँदैछ भनेर प्रशंसा गर्न पाउँदा सम्मानित महसुस भयो । आशा छ त्यहाँ भेट्नेछु ।
बालेनले पछिल्लोपटक महानगरको स्थापना दिवसको अवसरमा टुँडिखेलमा आयोजित कन्सर्टमा सहभागिता जनाएका थिए । पछिल्लोपटक फिल्म ‘लाज शरणम्’को शीर्षगीत पनि गाएका थिए, जुन अहिले युट्युव प्लाटफर्ममा ट्रेन्डिङमा छ ।
सुशान्तको कुरा गर्दा, उनी सन् २०२४ मा इन्टरनेट प्लाटफर्ममा सबैभन्दा धेरै स्ट्रिमिङ हुने नेपाली कलाकार हुन् ।
