कृष्ण रसाइली रुपन्देही : नेपाल नियमित रक्तदाता संघ जिल्ला शाखा रुपन्देहीले रोटरी इ- क्लब अफ मेडिकोफ्युजन हाइब्रीड नेपाल, जिल्लाका १६ वटा पालिकाहरु र औसधि उत्पादन कम्पनीहरु, विभिन्न सामाजिक संघ र संस्थाहरुको सहकार्यमा १८ विशेषज्ञ चिकित्सक सहितको निशुल्क स्वास्थ शिविर तथा रक्तदान कार्यक्रम रहेको “मानवीय सेवामा समर्पित अभियान”को आठौं कार्यक्रम रुपन्देही जिल्लाको लुम्बिनी सांस्कृतिक नगरपालिकामा सम्पन्न भएको छ।
लुम्बिनी सांस्कृतिक नगरपालिकाको संयुक्त आयोजनामा फागुन २४ गते शनिबारको दिन नगरपालिकाको वडा नम्बर ०७ स्थित श्री कर्महवा माध्यमिक विद्यालय, बिहान ९ बजेबाट सुरु भएको उक्त कार्यक्रममा निशुल्क स्वास्थ शिविरको लागि रोटरी इ- क्लब अफ मेडिकोफ्युजन हाइब्रीड नेपालबाट जनरल फिजिसियन र इन्टर्नल मेडिसिन विशेषज्ञ डाक्टर डा. अर्जुन विश्वकर्मा र अर्थोपेडिक डा. बिपिन ढकालले पालिकाका विभिन्न वडाबाट उपस्थित ३०० जना पालिकाबासीलाई निशुल्क स्वास्थ सेवा प्रदान गरेका थिए ।
रक्तदानको लागि उल्लेखनीय संख्यामा रक्तदाताहरुको उपस्तिथि रहेको उक्त कार्यक्रममा प्राबिधिक सहयोग नेपाल रेडक्रस सोसाइटी रक्तसंचार केन्द्र बुटवलको रहेको जानकारी नेपाल नियमित रक्तदाता संघ जिल्ला शाखा रुपन्देहीका अध्यक्ष अशेष शिलवालले दिए।
लुम्बिनी सांस्कृतिक नगरपालिका वडा नम्बर ०७ का वडा अध्यक्ष धुर्ब यादवको अध्यक्षता, पालिकाका नगर प्रमुख सजरुद्धिन मुसलमानको प्रमुख आतिथ्यतामा सम्पन्न उक्त कार्यक्रममा पालिकाका स्वास्थ शाखा प्रमुख ध्रुवराज घिमिरेको विशिष्ट आतिथ्यता रहेको थियो। डा.अर्जुन विश्वकर्मा, डा.विपिन ढकाल, नेपाल नियमित रक्तदाता संघका केन्द्रीय सल्लाहकार राजकुमार क्षेष्ठ, जिल्ला शाखाका अध्यक्ष अशेष सिल्वाल, उपाध्यक्ष भाष्कर शाही, सचिव इश्वरी प्रसाद बन्जाडे, नेपाल रेडक्रस सोसाइटी रुपन्देही उप-कोषाध्यक्ष अल्ताफ हुसेन खा, नेरेक्रसो लुम्बिनी उपशाखा सचीव दिनेश कुमार उपाध्य, वडा सदस्य बम बहादुर चौधरी, QRTV सदस्य रमेश भण्डारी , फर्मासिस्ट अनु चौधरी, लगाएत समाजसेवि, शिक्षकहरु सरोकारवाला, जनप्रतिनीधिहरु र कर्मचारीहरुको उपस्तिथि तथा आतिथ्यता रहेको थियो।
“मानवीय सेवामा समर्पित अभियान”को बारेमा जानकारी दिदै जिल्ला शाखाका अध्यक्ष तथा अभियानका परिकल्पनाकार अशेष शिलवालले रुपन्देही जिल्लामा हरेक दिन १००-१२० युनिट रगतको आवश्यकता रहने हुदा रगतको परिपुर्ति लाई अभियानले पालिका स्तरिय रक्तदान कार्यक्रम लाई अघि सारि रगततत्वहरुको अभावलाई परिपुर्ति गर्न जनमानसमा रक्तदान सम्बन्धि सचेतता अभिवृद्धि गर्ने,जिल्लाका ग्रामीण क्षेत्रमा उचित स्वास्थ सेवाबाट बन्चित बासिन्दाहरुमा रक्तचाप, मधुमेह, नसारोग, मानसिक स्वास्थ, महिला सम्बन्धि रोग, नाक कान घाटी, हाडजोर्नी सम्बन्धि लगाएत विभिन्न स्वास्थ समस्याहरुको लागि निशुल्क स्वास्थ परामर्श, स्वास्थ उपचार सेवा र औषधि वितरण गर्ने मुल उद्देश्यका साथ रोटरी इ- क्लब अफ मेडिकोफ्युजन हाइब्रीड नेपालबाट १८ विशेषज्ञ चिकित्सक सहित जिल्लाका १६ वटा पालिकाहरुमा हरेक हप्ता एक पालिकासङ्ग सहकार्य गरेर ५००० जिल्ला बासीलाई निशुल्क स्वास्थ सेवा र १६०० युनिट रगत संकलन गर्ने लक्ष्य सहित अभियानले साप्ताहिक ब्यापि निशुल्क स्वास्थ शिविर सहितको रक्तदान कार्यक्रम संचालन गर्ने बताए।
पालिकाका प्रमुख सजरुद्धिन मुसलमानले आफ्नो मन्तव्यमा यस्ता प्रकारका रक्तदाता अभिवृद्धि तथा रक्तदान सम्बन्धि सचेतना मुलक कार्यक्रम तथा रक्तदान कार्यक्रमले पालिकाबासीहरुमा थप रक्तदान गर्न उत्प्रेरणा गर्ने भन्दै नेपाल नियमित रक्तदाता संघ जिल्ला शाखा रुपन्देहीलाई धन्यवाद ज्ञापन गरे।
संघले कार्यक्रम सङ्गै विभिन्न स्थानमा रक्तदाता अभिवृद्धि तथा रक्तदान सम्बन्धि सचेतना मुलक सन्देश रहेका स्टिकरहरु पनि टास्ने र वितरण गर्न कार्य गरिरहेको छ।
